【Now.com】憑《全民造星III》突圍而出的「仙氣女神」雲浩影（Cloud），轉眼間出道3年。Cloud 將於今年8月迎來首個個人演唱會《Finding Cloud 雲浩影演唱會2025》，得知消息後Cloud更興奮表示：「終於要嚟啦！」，因為是她和「迷雲黨」期待已久的一場派對。
演唱會海報由合作無間的Miss Bean操刀，背景以天空藍色為主調，Cloud穿上白色背心裙躲於流蘇佈景之間，再輕輕探頭猶如邀請大家踏上尋找「雲」的旅程。她說：「同大家一齊去揭開、尋找真正嘅雲浩影。演唱會以Chapter形式進行，記錄咗我呢段時間學到同經歷過嘅嘢，希望透過歌曲同大家分享。」
阿Cloud又分享，獲悉後第一個通知蘇道哲，要預約對方成為今次演唱會的音樂總監。至於演唱會的歌單，Cloud坦言困難之處在於自己未有太多個人作品。她說：「要排一個完整嘅Rundown要考慮好多，當中亦有Cover歌，最困難係諗擺邊首Cover歌落去，因為自己有好多好喜歡嘅音樂，又知道歌迷喜歡嘅音樂，咁多歌，要好好思考同安排。」
距離演唱會還有個多月的時間，Cloud透露正努力減肥、練氣和訓練膽量。她說：「我上台時經常性會好緊張，然後會手震腳震，所以就去咗跳Bungee Jump練膽，都幾有趣。」回想起月初決定挑戰笨豬跳，Cloud稱之為「俄羅斯練膽大法」，說：「都係一個機緣巧合，當初有計劃宣傳演唱會，想Bungee Jump跳落去時講『我要開演唱會啦！』但我驚到忘記咗，所以跳落去就講咗其他嘢，好似『好叻呀！我做到啦！』當時情緒好激動，好多嘢就講咗出嚟，好開心。呢個Bungee Jump激發到我好多，原來驚都可以做到。」
首次開個人騷絕對是人生大事，假如只有5張門票，Cloud會邀請誰入場見證？她說：「首先一定係Daddy、媽咪、阿妹，仲有兩張飛我想請公公同婆婆，佢哋喺海南島加上年紀大，唔知佢哋會唔會搭飛機過嚟，但都好想佢哋睇到。」Cloud更揚言會準備經典歌曲唱給公公和婆婆聽，非常孝順！
雲浩影首個個人演唱會《Finding Cloud 雲浩影演唱會2025》將於8月2日假旺角麥花臣場館舉行，門票分為港幣$1,500、$1,080和$680。購買$1,500 VIP門票的「迷雲黨」（Cloud歌迷暱稱）可獲專屬福利，包括「To簽小卡」（Cloud將親手寫上該位歌迷名字）以及「1對1合照」。東亞銀行信用卡於6月25日早上10時起優先預訂門票，「迷雲黨」記得較定鬧鐘準時搶飛！
Finding Cloud 雲浩影演唱會2025
演出日期：2025年8月2日
演出時間：晚上8時
演出地點：旺角麥花臣場館
門票價錢：HK $1,500 (VIP門票) ／$1,080／$680
公開發售日期：待公布
Finding Cloud 雲浩影演唱會2025｜信用卡優先購票
指定信用卡：東亞銀行信用卡
優先購票日期：2025年6月25日（上午10時）至日（晚上11時59分）
優先購票渠道：www.hotdogtix.com 或 HotdogTIX手機應用程式
**東亞銀行信用卡持卡人請先登記成為HotdogTIX會員，以享優先訂票。
